Sipiika wa Plamenti, Rt. Hon. Rebacca Alitwala Kadaga aweze ababaka abiri mu bataano (25) okumala entuula za Palamemnti ssatu nga tebalabikako lwa kusiiwuuka mpisa. 

Abawereddwa be bano; Ronald Kibuule, Allan Ssewanyana, Amoding, Sam Lyomoki,  Moses Kasibante, Betty Nambooze, Robert Kyagulanyi, Francis Zaake, Kasozi, Nzohgu , Olanya, Angellina Osegge, Niwagaba, Odonga Otto, Nandala Mafabi, Mubarak Munyangwa, Nambeshe, Mbwatekamwa,  Mugume , Gonzaga Ssewungu, Barnabas Tinkasiimire, Muwanga Kivumbi ne Medard Lubega Ssegona.

Wabula ababaka bano basimbye nakakongo era nebagaana okufuluma ekizimbe kya Palamenti ,  wano Sipiika n’ayimiriza olutuula okumala eddakiika asatu era wano ab’ebyokwerinda ebikuuma Pulezidenti (SFC) ne Police erwanyisa obutujju n’etandika okufulumya omu ku omu mu  wakati mu kulwaganaga okw’amaanyi okubaddemu okuwanyisiganya enguumi, okukasuka obutebe, okumenya emizindaalo kwebateeseza nga n’abamu ku babaka bazirise.

Bo ababaka abafulumiziddwa batwaliddwa mu bifo eby’enjawulo omuli Kireka ku Special Investigations Division .

Sipiika wa Palamenti Rebecca Alitwala Kadaga awaliriziddwa okwongezaayo olutuula lwa Palamenti okutuusa olunaku lw’enkya oluvannyuma lw’ababaka b’oludda oluvuganya Gavumenti okukyankalanya nga entabwe eva ku kiteeso ky’okuggya ekkomo ku myaka gya Pulezidenti. 

Ababaka ab’oludda oluvuganya Gavumenti batandise okukooloobya Oluyimba lw’eggwanga wamu kitole  nga tebasiriikirizaamu okumala akaseera , Oluvannyuma lw’omubaka akiikirira Busiro ey’obuvanjuba, Medard Lubega Ssegona n’akiikirira Lwemiyaga, Theodore Ssekikubo okusimbira ekiteeso kino ekkuuli.

Bwatyo Sipiika n’awalirizibwa okwongezaayo olutuula okutuusa olunaku lw’enkya.

Police mu ttuntu lya leero esanze akaseera akazibu okuggya Col Dr. Kizza Besigye ku Mini. Price mu Kampala wakati oluvannyuma lw’okugikuba ekimmooni n’ayingira ekibuga nga ate yabadde emuuteegedde mu maka ge e Kasangati.

Okumuggya mu kifo kino emusikidde mu mmotoka ye nga tavuddeemu nga ekozesa kasiringi ya Police n’emutuusa ku CPS gy’esobodde okumuggyiramu.

Abantu baggadde amaduuka ku Mini – Price , Gazaland, Mukwano, Cornerstone , Majestic Plaza n’ebizimbe ebirala ebiriraanyawo nga bwebayimba “K’OGIKWATAKO”era wano Police ewaliriziddwa okukuba omukka ogubalagala n’amasasi mu bbanga okubagumbulula .

Wabaddewo akavuyo mu Palamenti olwaleero ng’ababaka b’oludda oluvuganya Gavumenti balumiriza omubaka wa Mukono ey’amambuka Hon. Ronald Kibuule okukukusa emmundu n’ayingira nayo mu kisenge mwebateeseza era wano emirimu gya Palamenti negisannyalala okumala akaseera nga n’okukasuka obutebe kutandise, ekokonde n’ensambaggere.

Omubaka akwasisa empisa ku ludda lw’ababaka abavuganya Gavumenti, Hon. Ssemuju Nganda ategeezezza Sipiika n’olukiiko nti Omubaka Kibuule yamutiisatiisizza nga bwagenda okumutta era wano Ssemuju n’ategeeza nga olutuula bwerutayinza kugenda mu maaso nga tebamaze kuggya mmundu ku Hon. Kibuule.

Oluvannyuma lwa bino Sipiika Kadaga ayimirizza olutuula lwa Palamenti era n’alagira abakulira eby’okwerinda mu Palamenti “Sergeant at arms” okwaza ababaka bonna, ekikoleddwa, oluvannyuma emirimu negiddamu okutojjera nga batandikidde ku kuteesa ku nsonga z’amafuta bweziyimiridde

Omubaka mu Palamenti owa Lwemiyaga ,  Theodore Ssekikubo alabiseeko ku kitebe kya Police ekikola ku kunoonyereza ku buzzi bw’emisango e Kibuli  mu ttuntu lya leero. 

Ssekikubo yalemererwa okulabikako ku kitebe kino ssabbiiti ewedde era ategeezezza nti yali tasobola kulabikako kubanga yalina ebirala byakola.

Agamba nti tagenda kukyusa mu kigambo kye oky’okusimbira ekkuuli ennongoosereza mu Ssemateeka ku kuggya ekkomo ku myaka gya Pulezidenti.

Ssekikubo awerekeddwako omubaka Omubaka Medard Lubega Ssegona era nga ye Puliida w’aboludda oluvuganya Gavumenti wabula tebasanzeewo Ofiisa yenna avunaanyizibwa ku nsonga zino era nebeerayirira obutaddayo!

Omubaka mu Palamenti ow’amasekkati ga Kampala,  Muhammad Nsereko yeerayiridde obutaddayo ku kitebe kya Police ekikola ku Kunoonyereza ku buzzi bw’emisango e Kibuli ku byeyayogera ku kuggya ekkomo ku myaka gya Pulezidenti.

Nsereko bw’abadde ayogerako ne bannamawulire ku kizimbe kya Palamenti mu Kampala,  agamba nti Police yafuna byonna byeyali emwetaaza lweyagendayo mu ssabbiiti ewedde era nti ye tolaba nsonga emuzzaayo.

Akoonye ku Minisita Nadduli ne Chris Baryomunsi abaliko nabo byeboogedde ku kkomo ly’emyaka naye bali mu maka gaabwe beegiriisa.

Police mu Disitulikiti y’e Kamuli  enkya ya leero ewaliriziddwa okukuba amasasi mu bbanga wamu n’omukka ogubalagala  okugumbulula abantu ababadde beesomye nga batandise okutambula okwolekera amaka g’omubaka omukyala mu Palamenti owa Munisipaali y’e Kamuli,  Rehema Watongola.

Babadde baagala kumutegeeza nti bo nga abalonzi mu kitundu kino tebaagala awagire kyakutaganjula Ssemateeka okuggyawo ekkomo ku myaka gy’omukulembeze w’eggwanga 75 kw’alina  okukoma okukulembera eggwanga.

Abantu bano bakulembeddwamu Ssentebe w’ekibiina kya DP mu bitundu by’e Busoga,  Moses Bigirwa.

Eggulire lino litusakiddwa Ramadham Wannume e Kamuli

Nampala w’ababaka mu Palamenti ab’oludda lwa Gavumenti, Ruth Nankabirwa asekeredde  ab’oludda oluwakanya Gavumenti abalowooza nti baawangudde NRM eggulo mu Palamenti okubalemesa okuleeta ekiteeso ky’okuggya ekkomo ku myaka gya Pulezidenti.

Nankabirwa agamba nti ekya Palamenti okuwa omubaka Raphael Magyezi omwaganya okuleeta ekiteeso kino tekigenda kulemesebwa era akakasa nti mu ssabbiiti eggya kiteekwa buteekwa okuyitawo.

Avumiridde eky’ababaka ab’oludda oluwakanya Gavumenti okukyankalanya Palamenti nga bafuuwa ffirimbi wamu n’okwesiba obuwero obumyufu okutiisatiisa ababaka b’oludda lwa Gavumenti.

Loodi Meeya wa Kampala Ssaalongo Erias Lukwago ayagala Gavumenti emuliyirire obukadde lusanvu(700) obwa ssente za Yuganda olwa Police okumutulugunya eggulo bweyabadde emuyoola okuva mu makaage e Wakaliga eggulo mu bwegugungo obwabaddewo ng’abantu bawakanya eky’okuggya ekkomo ku myaka gya Pulezideti.

Lukwago abadde ne Dr. Kizza Besigye mu lukungaana lwa Bannamawulire ku luguudo Katonga mu Kampala n’ategeeza nti okukuba omulanga kweyakoze kyavudde ku baserikale ba Police kumukuba kikonde mu kabutobuto wamu n’okumunyiga ebitundu bye eby’ekyama era ategeezezza nti amalirizza okuwandiikira Ssabawolereza wa Gavumenti .