Ababaka ba Palamenti okuva ku ludda oluvuganya Gavumenti nga bakulembeddwamu LOP Joel Ssenyonyi bagaaniddwa okuyinga mu kifo awazimbibwa eddwaliro lya Lubowa Specialized Hospital olunaku olwaleero nga wakayita emyezi 3 gyokka nga Palamenti eyisizza ssente obuwumbi 2 mu obukadde 700 nga zino zakulondoola mirimu egikolebwa mu kuzimba eddwaliro lino ezasabwa Ministry of Health- Uganda.
LOP Joel Ssenyonyi ategeezezza nti babadde bagenzeeyo kukola mulimu ggwabwe wabula abantu ababadde balina okubaggulira ggeeti okuyingira balondoole omulimu tebalabiseeko. Ono ayongeddeko nti kino kifo kya Minisitule ya Byabulamu naye yewuunyizza okusangawo abasirikale ba Uganda Police Force n’amaggye nga betoolodde ekifo kyonna nti era n’omulimu gwebagenze okulondoola nabo gubakwatako singa baliba balwadde nga betaaga obujanjabi.

Omwogezi wa Uganda Police Force SCP Fred Enanga avuddeyo nakakasa nti abantu 3 bebenyigidde mu kuttemula omukulu w’ekika ky’Endiga Lwomwa Eng. Daniel Bbosa. Bano kuliko; Enock Sserunkuma, ono nga yatiddwa abatuuze ababakutte ne Noah Lujja ngono ali mu Ddwaliro e Mulago gyafunira obujanjabi olwebisago bweyafunye ng’abantu babakutte ate ye owookusatu kigambibwa nti yemuludde nadduka.
Poliisi egamba nti ettemu lino lyandiba nga lyateekeddwateekeddwa kuba mukyala w’omugenzi ye teyatiddwa.

Katikkiro Charles Peter Mayiga; “Nfunye amawulire g’okutemulwa kw’Omutaka Lwomwa Eng. Daniel Bbosa, omukulu w’Ekika ky’Endiga, akubiddwa amasasi ng’atuuka ewuwe e Lungujja akawungeezi ka leero. Tetunnamanya bali mabega w’ettemu lino. Ebirala tuggya kubitegeeza Obuganda nga tubitegedde. Kitalo nnyo nnyini. Omwoyo gw’omugenzi Mukama agwanirize.”

Kitalo!
Omutaka Lwomwa omukulu w’Ekika ky’Endiga, Daniel Bbosa, akubiddwa amasasi agamutiddewo e Lungujja bwabadde ava Katosi Mukono kulambula b’Amasiga.
Gutusinze Ayi Bbeene twakuumye bubi!

Omumyuuka w’Omukulembeze w’Eggwanga Rtd. Maj. Jessica Alupo olunaku olwaleero akiikiridde Pulezidenti Yoweri Kaguta Museveni ku mukolo gwokusonderako ensimbi z’okumaliriza ekizimbe kyokusomesezaamu ssaayansi ku Bugema University. Pulezidenti Museveni awaddeyo obukadde 20 ziyambeko mu mulimu guno.

Ekitongole ekivunaanyizibwa ku kusolooza omusolo mu Ggwanga ekya Uganda Revenue Authority (URA) kyakutte emotoka Toyota Hiace Drone eyagibbwa mu Ggwanga lya South Sudan neyingizibwa mu Ggwanga oluvannyuma nannyiniyo nagiteekako ennamba y’emotoka endala ekika kya Drone nga tagisasulidde musolo.
Ono teyakoma kugibatiza nnamba wabula yagiteekamu n’ekikuubo kya blue ekya takisi olwo netandika okusaabaza abantu ku luguudo lwa Mbarara-Kampala.
Abakwasisa amateeka okuva mu URA e Masaka batandika omuyiggo gwayo wabula tebasobola kugikwata ku misanvu egyateekebwawo emisana kuba baali basazeewo kusaabaza bantu kiro. Basudde emisanvu ekiro mu ttawuni y’e Kaddugula, olwo ne nannyini yo nanoonyezebwa era nga yatandise dda okuwerenemba n’emisango. URA ekubiriza Bannayuganda okukozesa amakubo amatuufu okuyingiza mu Gggwanga emotoka.

Bannamaggye 22 abakuzibwa nga 30-January-2024 olunaku olwaleero bambaziddwa enyota zaabwe mu butongole ku mukolo ogubadde ku kitebe ky’amaggye ga UPDF e Mbuya nga gukulembeddwamu CDF Gen. Wilson Mbasu Mbadi.
Abakuziddwa kuliko ne Director ISO Colonel Charles Oluka eyakuziddwa okutuuka ku ddaala lya Brigadier.
Bya Kamali James

Nabbambula w’omuliro atanategeerekeka kwavudde akutte ekisulo ky’abayizi abawala ku ssomero lya God Cares Christian Primary School erisangibwa e Kirinnya mu Lukaya Town Council mu Disitulikiti y’e Kalungu mu kiro ekikeesezza olwaleero era ebintu by’abayizi byonna nebisaanawo. Mpaawo muyizi agiiridde mu muliro guno.
Ye omwogezi wa Poliisi ow’ettunduttundu ly’e Masaka Kasirye Twaha ategeezezza nti Uganda Police Force etandikiddewo okunoonyereza ku kiki ekivuddeko omuliro guno.