Police e Lugazi enkya ya leero  eriko emmundu gy'ezudde ng'erimu n'amasasi agawerako nga emmundu eno yabbibwa ku muserikale waayo ku Police y'e Bugembe e Jinja nga 17 Museenene omwaka ogwaggwa. 

Emmundu eno kika kya AK47 esangiddwamu amasasi makumi abiri (20) era nga yabbibwa ku Ntabelwa Habati abantu abatannategeerekeka .

Wabula enkya ya leero Police y'e Lugazi nga ekulembeddwamu agiduumira DPC Alex Wabwire bagombyemu omusajja obwala gwebasanze n'emmundu enzibe .

Police yooku mazzi e Jinja  eriko omulambo gw'omusarikale wa Securiko Sam Obua gwennyuludde mu mazzi ku mwalo gwa Rippon Falls ku nnyanja Nalubaale. 

Kizuuliddwa nti Obua abadde akolera mu kkampuni ya Alert Security Company esangibwa  e Jinja ku luguudo lw'e Iganga era nga omulambo gusangiddwa nga guseeyeeyeza ku nnyanja Nalubaale. 

Obua yabula okuva nga 01 omwezi guno ogwa Gatonnya 2018 era emmundu ye n'esangibwa ku ssomero lya St. Moses Primary School. Bwatyo aduumira Police e Jinja, Mbabazi Martin ategeezezza nti omulambo gwa Obua gutwaliddwa mu ggwanika ly'eddwalir ly'e Jinja. 

Ssaabalabirizi w’ekkanisa ya Yuganda eyawummula, Rt Rev Livingstone Mpalanyi Nkoyoyo afudde mu ttuntu lya leero mu ddwaliro lya Kampala Hospital.

Nkoyoyo y’eyasooka okuba Omulabirizi w’obulabirizi bwa Mukono (Mukono Diocese) era n’awoma omutwe mu kuzimba ekiggwa ky’abajulizi Abakulisitaayo e Namugongo.

Dr Nkoyoyo abadde ajjanjabwa ekirwadde kya kookolo w’emimiro okuva mu Ntenvu wa 2016 era yakomezebwawo mu ggwanga okuva e Bungereza gyeyali ajjanjabirwa mu Ssebaaseka wa 2017.

Kitalo nnyo !!

Entiisa ebuutikidde abatuuze enkya ya leero ku mwalo gw'e Nabulugo e Katosi mu ggombolola y'e Ntenjeru ekisangibwa mu Disitulikiti y'e Mukono oluvannyuma lw'okusanga mutuuze munnaabwe Steven Ssemwogerere ng'attiddwa.

Omulambo gwa Ssemwogerere gusangiddwa mu kitaba ky'omusaayi enkya ya leero ku mwalo okuliraana ebbajjiro lye w'abadde awenjeza ekigulira magala eddiba .

Akulira okunoonyereza ku buzzi bw'emisango e Mukono, OC CID Ibrah Batasi akakasizza bino era n'ategeeza anti okunoonyereza kugenda mu maaso wabula gwo omulambo gwa Ssemwogerere gutwaliddwa mu ddwaliro ly'e Kawolo gwongere okwekebejjebwa !!
 

Waliwo ekirwadde ekitannategeerekeka ekibaluseewo e Nakaseke, kiviirako abantu okusesema omusaayi okutuusa lwebafa

Abakwatiddwa ekirwadde kino bava omusaayi mu nnyindo n'okuva mu bitundu by'omubiri ebirala ebiriko awafulumya.

Ate n'ekirwadde kya Hepatitis B kikyeriisa enkuuli mu bitundu bya Nakaseke ebitali bimu – okusinziira ku Ssentebe wa LC 5 Ignatius Koomu Kiwanuka. 

Munisipaali y'e Mubende etongozza ekikwekweto ky'okuyoola abaana abataayaayiza ku nguudo z'ekibuga Mubende. 

Mmeeya wa Munisipiaali eno, Ssekiziyivu Innocent ategeezezza nti kino bakikoze olw'baana abasusse obungi mu kibuga abatembeeya ebintu omuli;  Ennyaanya, Entula, Obutungulu wamu n'obutunda mu ngeri emenya amateeka.

Ssekiziyivu annyonnyodde nti abaana abasinze obungi babinikibwa  n'e bintu ebitagya mu myaka gyabwe okubitembeya ekintu ekityoboola eddembe ly'abaana bano. 

Ssekiziyivu agasseeko nti embeera eno eviiriddeko n'abaana bangi okutomerwa ebidduka nebalemala oba  okufiirwa obulamu bwabwe bbo ng'abakulembeze kye batasobola kugumiikiriza.

Waliwo omuntu omu atategeerekese mannya afiiriddewo mbulaga mu kabenje akagudde okuliraana ekisaawe ky'e Namboole enkya ya leero  oluvannyuma lw'omugoba wa Takisi okukyukira mu luguudo bw'etyo lukululana y'amafuta n'emwambala. 

Luboggola Simba eyogeddeko n'omwogezi wa  Police y'ebidduka Charles Ssebambuulidde n'ategeeza nti Takisi nnamba UAV 308 P ebadde edda e Bweyogerere bw'erengedde abasaabaze omugoba n'agikyusa okugizza e gy'eva bwetyo lukululana y'amafuta ebadde edda e Kampala n'egitomera era okukkakkana nga ye Kkondakita akaliddewo ate omudereeva n'ayisibwa bubi nnyo. Babaddemu babiri bokka mu Takisi . Kitalo 

Kkooti enkulu mu Kampala esindise omusango gw'ababaka mu Palamenti omukaaga abaawawaabira Sipiika Kadaga olw'okubayimiriza mu ntuula za Palamenti musanvu mu kkooti ya Ssemateeka gutaputibwe. 

Okusinziira ku nsalawo ewandiikiddwa omulamuzi Margret Oumo Oguli nga esomeddwa omuyambi w'omuwandiisi wa Kkooti ento Joy Kabagye, ategeezezza nti ababaka bano Sipiika Kadaga ne Ssaabawolereza wa Gavumenti baabaawawaabira mu kkooti nkyamu nga baali balina kuloopa mu kkooti etaawulula enkaayana za Ssemateek era n'alagira buli ludda okwekolera ku nsimbi ezisaasaanyiziddwa buli ludda.

Kino tekigendedde bulungi ababaka abaawaaba omusango wamu ne ba Puliida baabwe era bagugumbudde omulamuzi Oumo olw'ekyo.  

Police my mu Kampala ekyatubidde n'emirambo gya basajja basatu abateeberezebwa okuba ababbi ba kkondo nga emirambo wetwogerera gikyali mu ddwalir e Mulago

Abaafudde  be , Akampa Jimmy, Bwakya Roben ne  Ibrahim abaabadde baagala okubba ekkolero lya Azam ne Kingdom Rice erisangibwa e Namanve nga 31 Ntenvu nga tumalako omwaka naye Police n'ebalinnya akagero. 

Ayogerera Police mu ggwanga, Emilian Kayima agamba nti balinda bannannyini bantu bano era yo nga Police tegenda kukkiriza muntu yenna kutwala mulambo gwonna  !