Minisita avunaanyuzibwa by’obusuubuzi n’amakolero mu ggwanga, Amelia Kyambadde alagidde amakampuni agakola sseminti okusala ku bbeeyi ya sseminti mbagirawo bwekitaba ekyo agenda kukkirizza abalina sseminti ali ku ssente entono okuva mu mawanga amalala ayingire mu ggwanga awatali kuwannaanya kwonna.

Amelia asinzidde mu Lukiiko mw’abadde ne Bannamakolero abakola sseminti ono olutudde mu ttuntu lya leero ku kitebe kya Minisitule y’ebyobusuubuzi mu Kampala.

Radio Simba eyogeddeko n’omwogezi wa Minisitule y’ebyobusuubuzi n’amakolero Nakakande Hadijja n’akakasa ensonga zino

Aduumira Police e Mubende awanjagidde Bannamawulire mu kitundu ekyo okukwasizaako mu kulwanyisa ebikolwa by’obumenyi bw’amateeka. 

Okoyo Martin bino abyogedde ng’asisikanye ab’amawulire abeegattira mu kibiina kya Mubende Journalist Association ku yafeesi zaabwe ku Simons Garden e Mubende.

Annyonnyodde nti bannamawulire baamugaso nnyo eri Police olw’ ensonga nti balina amawulire mangi gebafuna agasobola okuyamba Police okulwanyisa ebikolwa by’obumenyi bw’amateeka.

Bo bannamawulire aba Mubende Journalist Association bategeezezza Dpc Okoyo Martin nga bwe basanga okusoomoozebwa mu kufuna amawulire ku Police olw’abakulu mu Police ababeera bataagala kwogera nabo ate bwe bakola amawulire ne beekwasa nti tebabeebuuzizaako.

Gavumenti eyimirizza enteekateeka z’ekitongole ekikunngaanya omusolo mu ggwanga ekya Uganda Revenue Authority ez’okumanya ebikwata ku akawunta za Bannayuganda nga eyita mu bbanka ez’enjawulo.

Minisita avunaanyizibwa ku mpuliziganya ey’ekikugu n’ebyuma bikalimagezi, Frank Tumwebaze asinzidde mu lukungaana lwa Bannamawulire ku Uganda Media Centre mu Kampala n’ategeeza nti olukiiko lwa ba Minisita lwawadde Minisita avunaanyizibwa ku by’enfuna by’eggwanga Matia Kasaija ekiragiro awabule aba URA ku nsonga eno erabika nga eyinza okutaataaganya  eby’enfuna by’eggwanga lino

Abantu abakozesa oluguudo olugenda mu maka g’o mukulembeze w’eggwanga e Mubende beekokkodde agannya n’empompogoma ezijjudde mu luguddo luno byebagamba nti bitadde obulamu bwabwe mu matigga.

Kajura Misuseera Ssentebe w’ekyalo kya Booma hill ategeezezza nti oluguddo luno olwa Mubende Nakayima Booma Hill nga bwe luyitwamu omukulembeze w’eggwanga nga agenda mu maka ge agali e Mubende nti naye lwonna lujjudde agannya n’e mpompogoma era nga terukyayitikamu.

Kyakuwa Monica ne Nkyanzi Leticia abatuuze mu kitundu kino bategeezezza nti embeera ebasobedde olw’oluguudo olubi ennyo lwe bayitamu era nga beewunya lwaki tebafiibwako songa nga n’oluguudo luno omukulembeze w’eggwanga mw’ayita era nga waliyo ne Polojekiti nnyingi nnyo.

Ssekizivu Innocent Mayor wa Mubende Munisipalite  ku songa eno ategeezezza nti ddala kituufu oluguudo luno teruyitikamu nti naye ensimbi zebafuna ez’okukola enguudo ntono nnyo n’agumya abatuuze bano nti waliwo essuubi ery’okukola kkilomita emu ku kkilomita essatu oluguddo luno zerulina ezabaweereddwa nga ekirabo abagenda okukola ekkubo lya Mubende- Kakumiro- Kagadi- Kibaale.

Abasuubuzi boomu Kampala bayimirizza akeediimo kaabwe akabadde ak’okubaawo olunaku lwa leero.

Bano babadde baasalawo okuggala amaduuka gaabwe leero olw’ekigambibwa nti Gavumenti yalemererwa okuyingira mu nsonga z’okwekanama kw’ebisale by’amasannyalaze, engeri ey’okutulugunya abasuubuzi gyebakwatibwamu ekitongole ky’ebyemisolo ekya URA n’enkolagana eriwo wakati waabwe ne bannannyini bizimbe.

Okusinziira ku Ssentebe w’ekibiina ekitaba abasuubuzi mu Kampala Everest Kayondo, agambye nti baafunye amawulire amalungi okuva eri Gavumenti nga balina okugatuusa ku basuubuzi nga tebannasalawo kisembayo. Nabwekityo bayise olukungaana olw’awamu enkya nga 11 Kafuumuulampawu bategeeze abasuubuzi Gavumenti kyeyabagambye era babeeko ne kyebasalawo.

Waliwo omusajja Geoffrey Kasibante akubiddwa amasannyalaze n’afiirawo akawungeezi ka leero  ku William Street mu Kampala wakati.

Kasibante nga kati z’embuyaga ezikaza engoye alinnye ku ttaka ebbisi okuliraana ekifo omuli Transfomer awatambulirwa ab’ebigere.

Omwogezi wa Police mu Kampala n’emiriraano, Luke Oweyesigyire agambye nti Police edduse mangu okutuuka mu kifo kino era Kasibante n’addusibwa mu ddwaliro e Mulago gy’afiiridde ng’atuusibwa bwati era wetogerera omulambo gutwaliddwa nu ggwanika ly’eddwaliro lino.

Kinajjuklirwa nti ekitongole ekizikiza omuliro mu bbanga lya ssabbiiti bbiri eziyise kyalambika abantu engeri y’okukuumamu obulamu bwabwe mu biseera by’enkuba bino, nti basaanye okwewala Transformers, waya z’amasannyalaze, obutatambulira mu bigere, emiti gy’amasannyalaze egigudde n’ebirala.

Kkansala akiikirira  eggombolola y’e Nama ku lukiiko lwa Disitulikiti  Kyowa Sylivia Kyobe awonedde watono  awaalema ekkere okubuuka okugajambulwa abatuuze ababadde bataamye obugo bwebabade mu lukiiko olutegekeddwa aba Uganda Atomic Energy Council okusomesa abatuuze ku project ya  Gavumenti egenda okuleetebwa mu kitundu kyabwe.

Abatuuze okutabukira kkansala ono kiddiridde okuyimuka okwogera n’awagira Project eno okuleetebewa mu kitundu kino nga ate bo bagamba nti yandiba eyobulabe eri obulamu bwabwe.

Atomic Energy ensangi zino y’eri ku mimwa gya Bannamukono nga kigambibwa mbu ligenda kuba Kkolero lya bbomu.

Olukiiko luno olwetabiddwamu omubaka akiikirira ekitundu kino mu lukiiko olukulu olw’eggwanga Ronald Kibuule, ategeezezza nga bweyafuna okwemulugunya okuva mu batuuze bano era n’akutwalira Minisita “Energy”era nga kati alinda okuddibwamu ababuulire ekiddako.

Kibuule asimbidde ekkuuli Ppolojekiti  eno era n’asaba Gavumenti eginoonyeze ekifo ekitaliimu bantu.

Kkooti ejulirwamu eragidde abakungu ba Gavumenti kkumi balambirira omuli omuduumizi w’amagye g’eggwanga Gen. David Muhoozi, akulira abakozi ba Gavumenti John Mitala, Omubaka mu Palamenti Moses Balyeku ne Margret Muhanga , ssaako Keith Muhakanizi okulabikako mu kkooti eno e Mbale nga 17 Kafuumuulampawu omwaka guno babeeko byebannyonnyola ku birayiro byebaakuba nga bawagira eky’okuggya ekkomo ku myaka gy’omukulembeze w’eggwanga mu ssemateeka .

Wabula kkooti egaanyi okuyita Sipiika Rebecca Alitwala Kadaga olw’ensonga nti ye taliiko birayiro byeyakuba mu nteekateeka y’okugikwatako

Abalala abayitiddwa kuliko; Frank Mwesigwa ne Asuman Mugyenyi nga bano ba ofiisa ba Police, kkilaaka wa Palamenti Jane Kibirige wamu n’akulira eby’okwerinda bya Palamenti Ahmed Kagoye.

Kyaddaki ettendekero lya YMCA Mukono campus liggudde oluvannyuma lw’okumala ebbanga lya wiiki ssatu nga liggaddwa akakiiko akafuzi ak’ettendekero lino.

Essomero lino okuggalwa kyaddirira abayizi okwegugunga nga bawakanya eky’okulya obubi, obutaba na mazzi, amasannyalaze, awamu n’obutasoma.

Abayizi bano baatuka n’okugenda ew’omubaka akiikirira ekibuga Mukono mu Palamenti Betty Nambooze Bakireke abayambe.

Radio Simba eyogeddeko ne Principal w’ettenddekero lino Charles Kasajja Mukasa n’ategEeza nga bwebAatudde n’abayizi ensonga ne bazigonjoola.