Poliisi e Kakiri eri ku muyiggo ggwa Ivan Kiggundu nga kigambibwa nti abadde aleetera muwalawe ow’emyaka omusanvu abasajja bamusobyeko oluvannyuma lw’okukitegeera nti siyamuzaala.

Kigambibwa nti Maama w’omwana ono bweyagenda ku kyeeyo Kiggundu yamutwala ku DNA amukebeze nakizuula nti si wuwe bwatyo mbu olw’obusungu namuwaayo batandike okumukozesa buli kiro okutuusa bw’avunze ebitundu bye eby’ekyama.

James Kizza nga y’abeera n’omwana ono yategeezezza ng’abasomesa bwe baamuwulidde ng’avaamu ekivundu eky’amanyi wabula nga bwe bamubuuza tayogera, ekyabawaliriza okugenda ku poliisi gye yayogeredde nti kitaawe y’abadde amupangira abasajja ekiro.

Poliisi yasitukiddemu n’egenda mu maka ga Kigundu wabula baasanze adduse. Baakutte Paul Kalyesubula omwana gwe yabadde alonkomye nti amukozesa.

Omwana yategeezezza kitaawe abadde amutuma ewa Kalyesubula buli kiro ku ssaawa nga ssatu n’amuteeka ku buliri n’amusobyako, kyokka nga buli bw’abadde agamba kitaawe ng’amutiisatiisa okumutta singa abaako omuntu yenna gw’agamba.

Abakirisitu okuva mu bitundu ebyenjawulo beeyiye ku kijjukizo ky’abajulizi omuli ebisigalira byabwe ne bye baali bakozesa mu mirembe egyo ekiri ku Kigo e Kimaanya mu Disitulikiti y’eMasaka okulamaga mu kukuza olunaku lw’abajulizi.

Missa ekulembeddwamu Fr. Pere Richard Nyombi omuminsane mu White Fathers okuva e Nsambya ng’ayambibwako Bwanamukulu w’ekifo Fr. Joseph Matovu ne Bannaddiini abalala.

Omusirikale wa UPDF akwatiddwa lwakukuba basirikale banne bana amasasi nabalumya. Corporal Joram Tumwesigye ku camp emu e Namugongo yeyesuddemu akambayaya nakuba banne bana amasasi olw’ensonga etanategeerekeka. Omwogezi wa UPDF Brig. Richard Karemire agamba nti abalumiziddwa badusiddwa mu ddwaliiro nga bali mu mbeera mbi.

Brig. Karemire ayongedda nasambajja ebyabadde bisoose okufuluma nti omusirikale ono yabadde akubye abalamazi bataano nabatta.

Fr. Alex Oketch avunaanyizibwa ku kwogerera emikolo gy’okulamaga naye akikakasizza nti mpaawo mulamazi yalumiziddwa yadde okufa mu njega eno eguddewo.

Omulamuzi omukulu Yorokamu Bamwine asabye abantu obutawa balamuzi nguzi wamu n’abakozi ba kkooti abalala kubanga kibalemesa okukola emirimu obulungi era nga okubawa enguzi kyenkanankana n’okukema empologoma enjala gy’eruma.

Yagambye nti tebafuna ssente zimala era nga bwojja n’ebbaasa obeera obakema. Era yagambye nti nga bwoyinza okubulwa ssente ezigulira omwana amata ewuwo, nabo kibatuukako.

Sanchez 46, agenda kulayiziwba nga Prime Minister mu maaso g’omukulembeze ow’ensikirano Felipe VI mu lubiri lwe olwe Zarzuela mu kibuga Madrid.

Ono adda mu kifo kya Mariano Rajoy gwebagyeemu obwesige olwobulibwenguzi obukudde ejjembe mu kibiina kye ekya Conservative Popular Party (PP).

Enteekateeka z’okujaguza olunaku lw’abajulizi e Namugongo ziwedde era nga n’abalamazi abasinga obungi batuuse ku kigo ky’abajulizi e Namugongo era nga n’ebyokwerinda binywezeddwa.

Poliisi ekubiriza abantu bonna okukolera awamu n’ebitongole ebikuuma ddembe naddala ku bantu bebekengera wamu n’ebintu ebitateegerekeka nga bakuba ku nnamba 0800 199 108.

Abantu musanvu bafunye ebisago ebyamaanyi mu kabenje akagudde e Kagadi okuliraana Paacwa TC ku luguudo lwe Kagadi – Hoima Taxi nnamba UAS 779Y bwetomereganye ne Toyota Carina nnamba UAJ 432G.

Omwogezi wa Poliisi mu kitundu kya Albertine Mr Julius Hakiza agambye nti abalumiziddwa baddusiddwa mu ddwaliiro e Pacwa ne Kagadi.

Abalumiziddwa kuliko Murungi Teddy, Mugisha Julius, Asaba John, Ssenyonga Patrick, Murungi Gerald, Akankwasa precious ne Kasungwa Gerald.

Kigambibwa nti akabenje kano kavudde kukuvugisa kimama.

Ebivudde mu kulonda e Rukungiri biraga nti owa FDC awangudde ekifo ky’omubaka omukyala e Rukungiri:

FDC – Bamukwatsa Betty Muzanira =50,611

NRM – Matsiko Winfred = 46,329

  Omusuubuzi eyawambibwa nga 25 – May – 2018 abasajja bataano okuva e Kyengera azuuliddwa. Henry Ssematiko azuulidwa Poliisi nga asuuliddwa asibiddwa emikono nga ali mumbeera mbi e Wobulenzi bwatyo nadusibwa mu ddwaliiro e Mulago okufuna obujanjabi.

Kirowoozebwa nti ebyokumuwamba byandiba nga byekuusa ku ntalo eziriwo mu katale ke Kasubi gyali ku kakiiko.