Omumyuka wa Speaker w’Olukiiko olukulu olw’eggwanga Jacob Oulanyah agamba nti ebbugumu n’ebigambo ebyogerwa ku musolo ogwateekeddwa ku Social Media ne Mobile Money tebyetaagisa kuba temuli makulu.

Ono agamba nti buno obussente butono nnyo omuntu okuwawaza amatu g’abantu ate nga bebagenda okuganyulwamu mu biseera eby’omumaaso nga zibakoledde enguudo, amalwaliro n’ebintu ebirala.

Aba Mobile Money mu Wobulenzi e Luweero bagaddewo amadduuka gaabwe nga bekalakaasa olw’omusolo omupya ogwateekeddwa ku business yaabwe.

Bano bagamba nti oluvannyuma lw’omusolo guno okuteekebwawo bamaze enaku bbiri nga tebafuna bakasitoma. Era bagamba nti bakooye Gavumenti okubayingirira mu business zaabwe kuba mbu telina kyebayamba okuleka okubakama.

Eyali minister wa ICT George William Nyombi Thembo awadde abavubuka amagezi abasiiba ku Internet, okuwa omusolo ogwatekeddwawo governement okulakulanya eggwanga.

Nyombi Thembo agamba nti government yakirabyenga emikuutu gino kuliko abantu bangi nnyo abagyeyunira naddala abavubuka bwatyo kwekusalawo okugisaako omusolo basobole okwenyigira mu kukulakulanya eggwanga lyabwe. Agamba  nti omusolo guno ne Kenya baguleese.

Omubaka omukyala owa District ye Masaka Mary Babirye Kabanda alabudde abantu obutageza nebalonda ssentebe w’ekyalo nga talina maka wadde kabuyonjo.
Kabanda okwogera bino asinzidde ku kitebe kya District e Masaka bw’abadde asisinkyanye basentebe ababadde bazze okufuna akasiimo kaabwe okuva mu gavumenti.

Kabanda agamba nti abalonzi tebanditunuulidde bibiina wabula
obusobozi n’amaka amalungi n’agamba nti ssentebe apangisa ajja kufuukira abatuuze ekizibu naddala mu kaseera nga amwetaaga.
Ssentebe wa District eno Jude Mbabaali agamba nti bateeseteese okusomesa basentebe abanaaba balondeddwa wakiri bakuguke mu bukodyo bw’okusala emisango ng’egimu kumirimu egibalindiridde.

Abagoba b’ebidduka mu Kampala banyiivu olw’ebbeeyi y’amafuta eyekanamye. Bano bagamba nti okuva omwaka guno lwegwatandika ebbeeyi  y’amafuta yeyongera kulinya era nga gyebweyongera Uganda eyolekera ekyaliwo mu 2007 Kenya bweyafuna obwegugungo oluvannyuma lw’okulonda.

Mu Kampala ebbeeyi y’amafuta ekyukakyuka okusinziira ku ssundiro okugeza ku masundiro g’amafuta aga Total okusinziira ku mukutu ggwa website balaga nti litre ya Petrol eri ku 4,048 shs ate Diesel ku 3,693 shs

Abavuzi ba Taxi ne Boda boda bagamba nti ebbeeyi y’amafuta okulinnya ekoeseza nnyo enyingiza yaabwe so nga ate bbo abasaabaze tebakiriza kwongera ku bisale byebasasula.

Omubaka w’ekibiina kya NRM owa Bunyole West Eng. James Waluswaka awadde Bannayuganda amagezi abalaba nti emisolo Gavumenti gyeyataddewo gibanyigiriza era nga basanga obuzibu okugisasula bagende baffe kuba Uganda tejja kubeerawo ku kwewola nakusabiriza buyambi.

Poliisi ekutte abasajja babiri ababba emotoka okuli Mike Opidi ne Eric Okochil e Nansana. Oluvannyuma lw’obubbi bw’emotoka okweyongera nga ne Poliisi bwesala entotto, Poliisi ye Nansana esobodde okuzuula emotoka bbiri ezabibbwa. Ku monday ku makya ababbi bamenya amaka e Lungujja Kikumbi mu Katwe Division nebabba emotoka eyalimu GPS Tracker.

Nannyini motoka yaddukidde ku Poliisi e Kikumbi naloopa omusango ku bwebatyo nebatandika okulondoola GPS ye motoka eno nawa gyeri, bwatyo nga ayambibwako Poliisi balumbye ennyumba epangisibwa nga eri mu kikomera e Nansana West 2 Nakuule mwebasanze n’emotoka endala bbiri nga ziteereddwa mu Garage. Mukukebera emotoka endala basobodde okuzuula ebigikwatako era nebafuna nannyini yo.

Mukukebera ennyumba Poliisi Poliisi yazzudde nnamba z’emotoka, ebyuuma ebikozesebwa okumenya amayumba, Langi efuuyirwa ku motoka, master keys, amakufulu g’emotoka, card z’emotoka 31, switch 5, gear box n’ebintu ebirala bingi.

Poliisi mu Kampala ekoze ekikwekweto mwekwatidde abasajja babiri abagambibwa okwenyigira mu kukyuusa International Mobile Equipment Identity (IMEI) (Serial number) z’amasimu agebbeeyi agabibwa mu kibuga. International Mobile Equipment Identity (IMEI) (Serial number) z’amasimu ziyamba mukunoonya amasimu agaba gabiddwa.

Meseal Nkuubi ne Joseph Nsumba nga bonna bakoma mu S.6 babadde bakola omulimu guno nga beyambisa ebyuuma bikkalimagezi okukyuusa amasimu agaba gabiddwa. Kigambibwa nti ekyuuma kino ekikyuusa serial number bakigula ku mukutu ogwa e Bay ogutundu ebintu ku internet ne bafuna ne buvidiyo obusomesa enkola yaakyo okuva ku mukutu gwa YouTube.

Bano babadde bakolagana n’ekibinja ky’ababbi ba masimu mu Kampala n’emiriraano nga era bakola endagaano nabo nti kubuli ssimu gyebakyuusa bafunako ebitundu 23 ku 100 (23%). Bano basangiddwa n’amasimu n’ebintu ebirala bingi. Bano bakuumirwa ku CPS mu Kampala nga okunoonyereza bwekugenda mu maaso.

Dr. Stella Nnyanzi agudde ku Poliisi ya CPS naddusibwa mu ddwaliro lya Poliisi e Naguru nga biwala ttaka. kigambibwa nti abadde agenze ku Poliisi ya CPS mu Kampala okulambula ku basibe abakwatiddwa mukwekalakaasa okwaliwo ku lunaku lw’omukaaga okuli Obed Obedgiu, Kwokuboth Jalmeo ne Musiri David.

Omumyuka w’Omwogezi wa Poliisi mu ggwanga Patrick Onyango mukwogerako ne Radio Simba agambye nti kituufu Dr. Stellah Nnyanzi abadde  agenze ku CPS okulambula abasibe naye yandiba nga alina Sukaali oba Pressure wabula nga Poliisi emututte mu ddwaliro lyayo e Naguru.