Hezekiah Mukiibi 72, ow’e Kito – Kira mu munisipaali y’e Kira yaddukidde ewa RDC ng’amusaba okuyingira mu nsonga z’ettaka lye ly’agamba nti baagala kulitwala nga bano kuliko; Alice Nabitosi, Timothy Mawomero, Yusuf Ssemakula n’abalala ng’agamba nti yeekubidde enduulu ku poliisi y’e Kira n’eya Jinja Rd. naye tayambiddwa nga n’ebintu bye byayonoonebwa okuli faamu, emiti n’amayumba kyokka ng’ensonga ziri mu kkooti.
RDC yayise enjuyi zombi ezikaayana mu kafubo ku kitebe kya Munisipaali y’e Kira era olwakavuddemu n’agenda nabo okulambula ettaka lino.
Oluvannyuma yakubye olukiiko ku nsonga eno wabula ne wabaawo abajjidde mu booludda olulwanyisa Mukiibi nga bano RDC olwabadde okutandika okwogera ne bamutabukira nti tasaanidde kutuula mu nsonga zaabwe kubanga mupya talina ky’azimanyiiko n’abalala nti Mukiibi yandiba nga yamuguze okubagobaganya.
Waabaddewo okuwaanyisiganya ebisongovu, RDC kwe kusalawo okuyiwa olukiiko.