Abasirikale ba Poliisi bana basindikiddwa ku limanda e Luzira ku musango gw’okutulugunya wamu n’okulumya meeya we Kamwenge Goeofrey Byamukama eyakwatibwa okuva ku minisitule y’ebyettaka mu Kampala ku bigambibwa nti yandiba nga yalina omukono mu kuttibwa kwa AIGP Felix Kaweesi.

Abavunaanibwa kuliko D/ASP Patrrick Muramira, D/ASP Fred Tumuhairwe, Habib Roma ne Ben Odeke abasimbiddwa mu maaso g’omulamuzi wa kkoti ya Buganda Road Jamson Karemani nebasomebwa emisango ebiri okuli okutulugunya wamu n’okutuusa ebisago ebyamaanyi ku muntu.

Omuwaabi wa Gavumenti Nelly Asiku agamba nti bano nga 5 – April bakwata Meeya we Kamwenge okuva mu ofiisi ya Kamisona w’ebyettaka William Turyomurugeyndo nga beyambisa obutayimbwa ne miggo bakuba Byamukama nebatuuka okumukuulamu obukongovule n’amaviivi.

Kigambibwa nti bano bakola bino nga batambulira mu motoka nnamba UAT 460Y.

Ababawabirwa begaanye emisango era nebasindikibwa ku limanda e Luzira okutuusa nga 30 – May – 2017.