Abantu ba Ssaabasajja okuva mu ggombolola Mutuba IV Masekkati bakyaddeko embuga
Abantu ba Ssaabasajja okuva mu ggombolola Mutuba IV Masekkati mu ssaza Kyaddondo, olukiiko lwa KCCA olukulemberwa Loodi Mmeeya Erias Lukwago ne Mutuba VII Lwengo mu Buddu bakiise embuga n’oluwalo lwa nsimbi obukadde 16 n’emitwalo 60.
Batikuddwa omumyuka ow’okubiri owa Katikkiro era omuwanika wa Buganda Owek. Robert Waggwa Nsibirwa mu Bulange e Mengo.
Erias Lukwago agambye nti wakulwanirira ebintu bya Buganda ebikyali mu kitongole kya KCCA okulaba nga bikomezebwawo mu Bwakabaka era neyeyama ku lwa banne okugogola ennyanja ya Kabaka nti balinze bulinzi kigambo kya Katikkiro batandikirewo.
