Ekiwayi ky’abavubuka abegattira mu kibiina kya Uganda Poor Movement Activists bavuddeyo ne basaba Akakiiko okuva mu maka g’omukulembeze w’eggwanga akalwanyisa obuli bw’enguzi n’obukenuzi aka @Anti Corruption Unit – State House Uganda okukola okunoonyereza ku bakozi ba Bank enkulu abagufudde omugano nga ogw’enswa okubba ssente enkadde ezibeera ziziddwayo okusanyizibwawo mu matabi ga Bank enkulu okwetoloola eggwanga lyonna.
Kino kidiridde akakiiko kano okulumba ettabi lya Bank enkulu e Mbale nekakwata abakozi abaali begumbulidde okubba ensimbi enkadde zebalinanga okwokya. Ssempala Zayid nga ono ye mwogezi w’ekiwayi kino bwabadde ayogerako eri Bannamawulire agambye nti akakiiko kano kasaanye kanoonyereze ku matabi gonna okwetoloola eggwanga kuba obubbi buno bukolebwa mu matabi gonna.
Ssempala era asabye Pulezidenti Yoweri Kaguta Museveni okuvaayo akole enkyuukakyuuka mu bwangu mu bakulira Bank of Uganda nga agamba nti balemereddwa okutuukiriza emirimu gyabwe.