Minisita w’eby’obulamu mu bwakabaka, Dr. Prosperous Nankindu Kavuma, akyaddeko mu bifo omukuumirwa abaana abalondeddwa ku nguudo ab’ekitongole kya Dwelling Places. Asookedde Buloba oluvannyuma naagenda e Mutundwe ng’eno alambudde ebisulo, wamu n’emirimu egy’enjawulo egikolebwa abaana bano.
Bwabadde ayogerako eri abakiikiridde ebitongole eby’enjawulo ebirwanirira eddembe ly’omwana, Oweek Nankindu ategeezezza nti obwakabaka bugenda kukozesa ebika okumalawo ekizibu ky’abaana ku nguudo nga bakubiriza abakulu b’ebika okukubiriza bazzukulu baabwe okufaayo okulabirira abaana baabwe.
Oweek Nankindu avumiridde ekikolwa eky’okukusa abaana nebabatwala nebabakozesa nga abaddu. Agambye nti kino kirina okukoma kubanga kityoboola eddembe ly’omwana.
Mu ngeri yeemu Oweek asabye abantu abagabira abaana b’okunguudo ssente bakikomye kubanga kino kyekiremezza abaana bano ku nguudo.
Obwakabaka bwatta omukago n’ekitongole kya Dwelling Places okulaba engeri gyebayinza okukolagana okukendeeza ku muwendo gw’abaana abali ku nguudo.
Okusinziira ku Oweek Nankindu, abaana abaganda n’aba Karamoja bebasinga ku nguudo okusinziira ku kunoonyereza okwakolebwa.
Leave a Reply
You must be logged in to post a comment.