Shanitah Namuyimbwa aka Bad Black avuddeyo nayambalira omuyimbi Namukwaya Hajara aka Spice Diana bweyavuddeyo nateekayo ekifaananyi kyeyekubye nga agenze okulaba muyimbi munne Evelyn LAGU mu Ddwaliro; “Nandibadde njogera bingi naye kino kyekikolwa ekikyasinze obubbi ennyo kyendabye ku yintaneeti olwaleero olwokuba oli anooya erinnya ebitakola makulu. Ogwo gwemutima omubi ennyo oguli mu ddiba ly’omubiri ogutukula. Nze nsaba Allah obutantuusa awo antwale nga mangu. Kati ebifaananyi byaki? Bwoba osazeewo kuyamba yamba oba ekigendererwa kyabadde kyakwekubya bifaananyi!”

Okuwulira Omusango oguvunaanibwa Omubeezi wa Minisita avunaanyizibwa ku nsonga z’e Karamoja Agnes Nandutu ogwokubba amabaati 2000 agaali agabantu abayinike e Karamoja kutandise olwaleero ku Kkooti ewozesa abakenuzi n’abali b’enguzi. Oludda oluwaabi lubadde lwetegese n’abajulizi 2 wabula Bannamateeka ba Nandutu okuli aba Alaka & Co. Advocates and Nandaah Wamukoota & Co. Advocates nga bakulembeddwamu Caleb Alaka bavuddeyo nebategeeza Kkooti nti baagala okuwulira omusango guno kuyimirirwe basooke balinde Kkooti etawulula enkayaana za Ssemateeka esooke ewulire ku kyomusango ogwaggulwa ku muntu waabwe ogw’okusangibwa n’ebintu ebiteeberezebwa okuba ebibbe kuba mugazi nnyo nga guleetawo n’emisango emirala 2 nti era tegwannyonyolwa bulungi nga Ssemateeka bwekirambika.
Alaka ategeezezza Omulamuzi Jane Okuo Kajuga nti yadde babamaze okuteekayo okwemulugunya kwabwe mu Kkooti etatulula enkayana za Ssemateeka nga bawakanya omusango guno, Kkooti nayo erina okwekeneenya obulungi omusango guno eveeyo n’ebibuuzo ebyayo.

Pulezidenti wa National Unity Platform Kyagulanyi Ssentamu Robert aka Bobi Wine avuddeyo nategeeza nga akulira ebigenda ku mutimbagano mu Kibiina kya NUP Swaburah Ow’omukisa bweyawambiddwa abasajja ababadde babagalidde emigemerawala olunaku lw’eggulo mu ttuntu okuliraana amaka ge nga negyebuli eno tanamanyikako mayitire.

Mukyala Lydia Nandala, omusomesa ku Nabuyonga Primary School mu Disitulikiti y’e Mbale olwaleero agumbye ku ssetendekero wa Kyambogo ngayagala bamubuulire lwaki muwala we yalemeseddwa okukola olupapula lweyaggwa omwaka oguwedde olwamulemesa okutikkirwa.

Muwala we Patience Muyama, asoma Diploma in library and Information Science yalina okuddamu olupapula lweyaggwa mu February 2023 oluvannyuma lwobutatikkirwa mu December 2022, wabula Head of Department, Dr Robina Namuleme yayongezaayo okuddamu olupapula luno okutuusa mu mwezi gwa May 2023 wabula ate kyababuuseeko bwebabategeezezza nti olupapula lwogezeddwayo okutuusa mu November 2023.

Pulezidenti Yoweri Kaguta Museveni olunaku olwaleero aguddewo mu butongole ettendekero lya Greater Masaka Industrial Skilling Hub. Ekifo kino kyakutendeka ku bwereere abavubuka abali wakati w’emyaka 18-35 okuva mu Disitulikiti 9 emirimu egyemikono.

Minisita avunaanyizibwa ku by’enguudo n’entambula Gen. Edward Katumba Wamala avuddeyo nagumya abalamazi abakozesa oluguudo lw’e Masaka okudda e Namugongo nti bagenda kubateerawo olutindo olw’akaseera lubasobozese okusala omugga Katonga. Era asabye Bannayuganda okubeera abaguminkiriza nga Gavumenti bwekola kyonna ekisoboka okudaabiriza olutindo olwaggwamu okusobozesa eby’entambula okuddamu obulungi.

Omumyuuka wa Sipiika wa Palamenti Thomas Tayebwa avuddeyo nategeeza; “Olweggulo lwaleero, Omubeezi wa Minisita ow’ebyenjigiriza avunaanyizibwa ku matendekero agawaggulu, Owek. John Chrysostom Muyingo yayanjudde ekiwandiiko ku ‘masomo agaggwaako’ n’atangaaza nti ebisaanyizo by’abayizi abamaze Ddiguli oba Ddipulooma ku pulogulaamu ezifunye okukkirizibwa nga tebinnabaawo, okusinziira ku mutindo n’ebiragiro ebitandikirwako ebya National Council for Higher Education (NCHE) bituufu. Kino kiŋŋumizza nnyo era namwebaza olw’okunnyonnyola okwo okukulu.
Wabula nsabye Minisita obutakozesa bigambo by’amaanyi kuba birina engeri gyebikosaamu oba olyawo. Mubuuzizza lwaki okozesa ekigambo okuggwako (expiry)?
Muyingo era ategeezezza nti wadde nga beyambisizza ekigambo ‘Expired’ nti course zino ziba tezirina kusuulibwa mu kasasiro oba kuggibwawo nti wabula ebiba bisomesebwa biba byetaaga kuddamu kutunulamu babyekeneenya basobole okubituukanya n’omutindo.”
Sipiika alagidde Minisita Muyingo okuwandiikira NCHE ekyuuse ekigambo ‘Expired’ kyeyatadde ku masomo ago eteekeko ‘programmes under review’.