Pulezidenti Yoweri Kaguta Museveni; “Ntuuse mu Kibuga Nairobi ekya Kenya, mu nsisinkano eyookusatu ey’Abakulembeze b’Amawanga agegattira mu East African Community (EAC) okwogera ku nsonga zokuzza emirembe nebyokwerinda mu Ggwanga lya Democratic Republic of Congo (DRC).”

Ababaka b’Oludda Oluwabula Gavumenti mu Palamenti nga bakulembeddwamu abakulira Rt. Hon. Mathias Mpuuga Nsamba bavuddeyo nebategeezezza nti ekimu ku bintu byebenyumirizaamu byebakoze kwekukendeeza ku sipiidi Gavumenti gyeyewolamu ssente munda mu Ggwanga ng’eno ebadde esusse ogwomulamuzi.

Kkooti ejulirwamu ekakasizza Hon. Connie Nakayenze Galiwango ku kifo ky’ omubaka omukyala ow’ ekibuga kye Mbale mu Palamenti ng’ ono obuwanguzi bwe bubadde buwakanyizibwa munnakibiina kya National Resistance Movement – NRM, Lydia Wanyoto.

Minisitule evunaanyizibwa ku nsonga z’omunda mu Ggwanga evuddeyo netegeeza nga okukebera abantu bonna abagenda okukola ebweru w’Eggwanga bwebagenda okusooka okubakebera oba nga bakyalina ebitundu byabwe byonna ebyomubiri nga tebanalinnya nnyonyi kugenda. Minisitule egamba nti kkampuni zino zirina okusasulira okukebera kuno.

Pulezidenti Yoweri Kaguta Museveni avuddeyo nasaba abasomesa okwetoloola Eggwanga lyonna okukomya akediimu baddeyo ku masomero basomese kuba Gavumenti netegefu buli mukozi wa Gavumenti okumusasula obulungi. Pulezidenti agamba nti buli omu wakusasulwa bulungi wabula mukadde kano batunuulidde nsonga yabasomesa ba Ssaayansi.

Pulezidenti bino abyogeredde mu nsinsinkano gyabaddemu ne ba mmemba okuva mu Uganda National Teachers Union (UNATU) mu State House, Entebbe. Ono abadde ne Minisita w’ebyenjigiriza n’ebyemizannyo Janet Museveni. Abalala ababaddemu kubaddeko Minisita avunaanyizibwa ku nsonga z’abakozi Hon. Muruli Mukasa, omubeezi wa Minisita avunaanyizibwa ku masomero ga Pulayimale Hon. Dr. Joyce Kaducu; Ssentebe wa UNATU, Mr. Zadock Tumuhimbise n’omuwandiisi owenkalakkalira mu Minisitule y’abakozi, Ms Catherine Bitarakwate  ne Patrick Muhereza.