Ssaabawandiisi w'ekibiiba ekitaba abasomesa mu ggwanga ekya Uganda National Teacher's Union (UNATU), James Tweheyo afuumuddwa mu yafeesi y'obwa Ssaabawandiisi olw'embeera ezitategeerekeka ezaaviirako bbanka okuteeka envumbo ku akawunta z'ekibiina kino.

Gyebuvuddeko ku ntandikwa ye ssabbiiti ewedde , Tweheyo yayogerako mu lukungaana lwa bannamawulire ng'ayinyira yafeesi eno mu kisanja ekirala eky'obwa ssaabawandiisi w'ekibiina kino era yeerayirira okutandikira weyakoma nga essira aliteeka mu kukuuma ekibiina ky'abasomesa eky'obwegassi mwebayita okutereka ensimbi zaabwe  (SACCO) ate n'okufuba okulaba nga abasomesa bongezebwa emisaala.

Wabula ate olwaleero, Tweheyo ng'asinziira ki kitebe ky'ekibiina ku Teacher's House mu Kampala, ategeezezza ab'amawulire nti awaddeyo yafeesi oluvannyuma lw'olukiiko olukulembeze okugaana okuzza obuggya kkontulakita ye era nebamugamba ayamuke yafeesi !!

Police e Kasambya mu Disitulikiti y'e Mubende erinnye eggere mu lukiiko oluyitiddwa ababaka mu Palamenti aba Togikwatako okuli Theodore Sekikubo, Banarbas Tinkasimire, Patrick Nsamba wamu ne Mbwatekamwa Gaffa Louis era abamu kubo n'ebaggalira.

Kino kiddiridde bano okwegatta ku Mbwatekamwa Gaffa Louis omubaka mu Palamenti owa Kasambya  nebakuba olukungaana olwebuuza ku bantu ku nsonga ya Togikwatako mu ttawuni kkanso y'e Kasambya.

Omubaka Theodore Sekikubo ategeezezza nti yadde nga Police ekutte munnabwe Mbwatekamwa naye oluvanyuma emuyimbudde kukakalu ka Police 

Ye Simewo Nsubuga omubaka mu Palamenti  owa Kassanda ey'amaserengeta, alaze okutya nti ensonga z'okuggya ekkomo ku myaka gya Pulezidenti zitemyetemye nnyo mui bantu b'e Mubende wabula n'awera nti baakuggya ekkomo ku myaka gy' omukulembeze we ggwanga.

Omubaka mu Palamenti owa Budadiri ey'obugwanjuba  ate nga ye Ssaabawandiisi w'ekibiina kya  FDC, oluvannyuma lw'okumala ennaku bbiri mu kaduukulu ka Police,   Nathan Nandala Mafabi yerayiridde okugenda mu maaso n'okukuba enkungaana mu balonzi be ku nsonga z'okuggya ekkomo ku myaka gy'omukulembeze w'eggwanga.

Nandala nga yagombebwamu obwala e Mbale ku lwokutaano n'atwalibwa ku kitebe kya Police e Tororo era n'aggulwako emisango gy'okuleeta obutabanguko nga akulemberamu abantu okwekalakaasa nga bawakanya eky'okuggya ekkomo ku myaka gya Pulezidenti.

Sowedi Mansur ayogerera Police mu mu bitundu bya Elgon agamba nti Mafabi yateereddwa ku kakalu ka Police era nga yagguddwako emisango gy'okukuma omuliro mu bantu .

Ssaabalabirizi w'ekkanisa ya Yuganda,  His Grace,  Stanely Ntagali alabudde abavubuka ba Yuganda okukomya okudduka mu ggwanga nga beeyuna amawanga ga Buwalabu okukolayo emirimu gyebasuubira okubaako omusaala omusava wabula nga ate n'emirimi gyebagenda okukola tebagyekakasa oluusi ekibaviirako okubonaabonera mu mawanga ago. 

Ssaabalabirizi asinzidde Mulago mu Kampala  ku kkanisa eyabbulwamu Omutukuvu Lukka gy'abadde ku mirimu gy'obuweereza n'ategeeza nti Bannayuganda bangi bafiiridde mu mawanga ago nga abamu battiddwa ate abalala nebawalirizibwa okwetta bokka na bokka olw'embeera zebayitamu kino nekiviirako abantu baabwe okusigala mu nnaku etagambika. 

Agamba nti Gavumenti kigigwanidde okwagizisa abavubuka okwetandikirawo emirimu mu kifo ky'okunoonya emirimu mu mawanga ag'ebunaayira 

Police mu Disitulikiti y'e Luuka eriko omusawo w'ekinnansi  Nantamu Eliasi ow'emyaka 48 gwegombyemu obwala agambibwa okwekakaatika ku mulwadde we wa myaka 12.

Nantamu nga mutuuze wooku kyalo Nanvunamo ekisangibwa mu ggombolola y'e Waibuga mu Disitulikiti y'e Luuka ye yabojjeredde akaana kano akaabadde kaleeteddwa kitaawe waako okujjanjabwa ensimbju.

Abakulira eby'obulamu mu Disitulikti y'e Busoga mu Luuka bawaliriziddwa okuggalawo eddwaliro lya Kiwalazi Health Centre III mu ggombolola y'e Irongo oluvannyuma lw'engalama y'eddwaliro okugwira abalwadde era abasatu bu bo nebalimizibwa.

Dr. Panyako Wabwire, omulambuzi w'ebyobulamu mu Disitulikiti y'e Luuka agamba nti mu balumiziddwa mwemuli n'omukyala abadde asulirirwa okusumulukuka. 

Panyako agamba nti nti Namugere Zawuja n'abalala ababiri abalumiziddwa batwaliddwa mu ddwaliro ly'e Kiyunga Health Centre IV bongere okufuna obujjanjabi obusingawo . 

Police yegaaye ebyogerwa nti erimu okulaga kyekubiira ku nsonga y'okukubaganya ebirowoozo okugenda mu maaso mu ggwanga ku kyokukwata ku nnyingo ya 102b.

Vicent Ssekate ayogerera ekitongole ekikwasisa empisa mu Police agamba nti bino ebiboogerwako matu ga mbuzi okubaliisa engo, nti ejuyi zombi oluwagira n'oluwakanya , ziyisibwa kyenkanyi .

Police eriko abaserikale baayo babiri beegombyemu obwala nga bali mu kitongole kya Interpol okuli ; Inspector Bukholi Edison ne Inspector Musasa Chris nga bateerezebwa okuggya emitwalo munaana mu enkumi bbiri eza America ( 82,000USD) ku musawo munnayuganda ku kifuba – Senior Surgeon akolera e Namibia.

Nti bamulanga okukukusa ssente nga y'aliba ng'akolagana ne Dr. Aggrey Kiyingi  ali mu Australlia okuwagira ebikolwa ebireeta obutabanguko mu ggwanga. 

Ssente zino baazimuggyirako Mutukula ku nsalo ya Yuganda ne Tanzania ng'ayingira Yuganda.

Obukama bwa Tooro buttukizza okubanja Gavumenti  ebintu byabwo ebyawambibwa Gavumenti ya Obote mu 1976 era bwagala bibuddizibwe mangu ddala.

Nga era obukulembeze bw'ennono obulala bwebubanja ebyabwo, Tooro ebanja ettaka wamu n'ebizimbe nga kati bino birimu ebitongole bya Gavumenti kyokka nga tebisasula eri Obukama newankubadde nga endagaano ey'okuzza  ebintu bino eri Obukama yateekebwako dda omukono.

Bw'abadde ayogerako eri ab'amawulire enkya ya leero ku Fair Way Hotel mu Kampala, Katikkiro w' Obukama bwa Tooro, Owek.Bernard Tungakwo Ateenyi ng'ali wamu n'abakungu okuva mu Obukama, agamba nti bagezezzaako buli ekisoboka naye Gavumenti eky'okubaddiza ebyabwe ekikutte kasoobo .