Ssaabaduumizi wa police avumiridde ebikolwa eby’obulumbaganyi ku Police ye Kidodo e Kasese.

Kayihura yadduse za mbwa e Kasese oluvannyuma lw’obulumbaganyi buno omwafiiridde omuserikale wa Police Charles Kasimba gattako n’omulumbaganyi omu Mbusa. Wabula omuserikale omulala Nelson Bwambale yabuuseeyo na biwundu.

Kayihura agamba nti obulumbanyi buno buli ku ggwanga ne bannansi, wabula n’akukkulumira obugayaavu obwabadde ku Police eyo wakati mu bulumbaganyi.

Ssaabapoliisi alabudde abo bonna abenyigira mu bikolwa bino nti balye kamanye ng’akoza n’owebbwa kubanga amateeka gaakubassaako omukono ogw’ekyuma.

Kayihura yakyaliddeko omuserikale eyabuuse n’ebiwundu Nelson Bwambale mu ddwaliro eriri e Kilembe.

Abakungubazi e Namasagali mu disitulikiti ye Kamuli basattira wamu n’okuzikubamu amakiikakiika lwa mutuuze munnaabwe kulaama bamuziike mu ntaana ya fuuti 100. 

Nansololo ye yafudde mu Gombolola ye Namasagali mu disitulikiti ye Kamuli wabula abakungubazi bagenze okuggyayo ekiraamo nga ayagala kumuziika mu ntaana ya fuuti 100 nti abasezi baleme okumulya. Ekireetedde abakungubazi okutunula omukonga nga kino tebakirabangako wadde okukiwulira era bwebatyo nebongezaayo okuziika nga bibasobedde kubanga entaana entuufu eba ya fuuti 7.

Ssemaka e Bamunaakika atemyetemye mukyalawe kata amutte lwa kumumma kaboozi ka kikulu. 

Sam Mawangala yaatemyetemye mukyalawe Annet Gwokyala lwakumumma ka Kyagera okuva akalulu lwekaggwa.

Abafumbo bano ababiri babadde bawagira abesibyewo ku bwa Ssentebe bwa LC 111 banjawulo, omwami gw’awagira yeyawangula bw’atyo omukyala n’akwatibwa ensaalwa era okkakkana ng’akaboozi omwami akafuuye mu ngombe. Ekyo kyekijje omwami ono mu mbeera bw’atyo nasanjaga mukyalawe ng’amutema ebiso okubula okumutta. Wetwogerera nga omukyala addusiddwa mu ddwaliro lye Wobulenzi ye omusajja agombeddwamu obwala Police  atemeza mabega wa mitayimbwa nga police bw’ekola okunoonyereza.

Kooti e Kasangati enkya ya leero eyisizza ekiragiro eri aduumira Police mu ggwanga General Kale Kayihura ne Wesley Nganizi aduumira police mu mambuka ga Kampala okwewozaako nga tezinnawera ssaawa mwenda eza leero, ku musango gwa Dr. Kizza Besigye gweyawawaabira ogw’okumusibira mu makage.

Dr. Besigye Kati amaze ennaku 31 mu busibe mu makage okuva akalulu k’obwa Pulezidenti lwekaggwa mu gwokubiri nga Police egumbye mu makage.

Kino kiddiridde Ssaabawaabi

Namulanga Ronald myaka 34 ye yeggye mu budde nga yaakamaliriza embaga mawuuno mu gombolola ye Ibukulu e Namutumba.  

Asangiddwa ng’alengejjera ku muti waggulu nga waliwo akabaluwa akabadde kalaga amabanja agamuyinze obuzito agateeberezebwa okuba nga yageewoze okukola embaga makeke.

Police eyitiddwa era n’emusalayo ku muguwa era n’esaba abantu okwebuuza ku bannaabwe nga tebannasalawo ku bintu ebimu.

Omuserikale wa police abadde asaabalira ku Boda Boda mu bitundu bye Bukedi afunye akabenje ku piki kw’abadde asaabalira n’afa ng’atuusibwa mu ddwaliro.

Namuleyi David nga abadde akulira Police mu kifo ekimu y’afudde ate abadde a muvuga Wakholi Joseph  ye ali mu ddwaliro apookya

Ayogerera police mu Bukedi region Kamura Soali agamba nti enkuba ebadde ofudemba y’evuddeko kalumanyera ate nga nabo babadde bavuga ndiima. Kitalo.

Police e Iganga esitukiddemu ng’eyatega ogw’ekyayi okunoonyereza ku ngeri omupangisa gyeyakubyemu Landlord we n’amutta bweyabadde agenze okubanja ez’obupangisa .

Kino kiri mu gombolola ye Bualamagi mu disitulikite ye Iganga .

Litusakiddwa Willy Basoga Kadaama e Iganga .

Omusajja kaggw’ensonyi  e Jina eyagombeddwamu obwala aggulo lwakukabasanya muwalawe myaka 13 n’amusiiga obulwadde , asindikiddwa mu kooti enkulu gy,aba avunaanibwa. 

Kaggw’ensonyi ono Sheikh Juma Nyiri 45 eyasindikiddwa ku alimanda e Luzira aggyiddwayo Police oluvannyuma lw’okutemezebwako nnyina w’omwana nti yamufunyisizza olubuto .

Wabaluseewo  katemba e Iganga abakungubazi babunye emiwabo ng’omukazi gwebabadde bagenda okuziika bw’akubye omwasi era n’asaba n’ekyokunywa.

Bono bibadde ku kyalo Nakalama trading center  okuliraana ekibuga kye Iganga .

Lino litusakiddwa Solomon Baleke.