Pulezidenti wa Tanzania Samia suluhu Hassan ebitaddemu engatto olunaku olwaleero okwolekera Uganda okussa omukono ku ndagaano egenda okusobozesa okutandika okuzimba omukutu gw’amafuta ogwa East African Crude Oil Pipeline (EACOP) okugenda okuva e Hoima, Uganda okutuuka e Tanga, Tanzania.
Akakiiko k’ebyokulonda aketengeredde aka Electoral Commission Uganda kavuddeyo nakanukula okwemulugunya kwa Sulaiman Kidandala bweyavaayo ngawakanya obuwanguzi bwa Munnakibiina kya NUP Mohammed Ssegiriinya kati ali mu kkomera.
Kidandala omwezi oguwedde era yaddukira mu Kkooti Enkulu mu Kampala ngayagala esazeemu okulangirirwa kwa Ssegiriinya nti talina buyigirize bumala kumufuula mubaka wa Palamenti.
Wabula akakiiko k’ebyokulonda kakamutemye, Barbra Mulimira Returning Officer wa Kampala Electoral District avuddeyo nategeeza okuwandiisibwa wamu n’okulondebwa kwa Ssegiriinya kwakolebwa nga bagoberera amateeka agetekebwawo okuluŋŋamya ebyokulonda mu Ggwanga.
Okusinziira ku kirayiro kya Mulimira, kiraga nti Ssegiriinya yakomyawo Nomination Form nga ataddeko ebiwandiiko bye ebiraga nti yasoma Siniya eyokuna wamu ne Siniya eyomukaaga nga zonna ziri mu mannya Ssegirinya Richard okuva Pimbas Secondary School wamu n’ekirayiro kyeyakuba nga akyuusa amannya okuva mu “Segirinya Richard” okufuuka “Segirinya Mohammed”.
Kino kitegeeza nti okuwandiisibwa, okulondebwa wamu n’okuteeka erinnya lya Ssegirinya mu Gazette Akakiiko k’ebyokulonda ng’Omubaka wa Kawempe North omulonde kyakolebwa mu mateeka oluvannyuma lwokukizuula nti yasoma Siniya eyomukaaga era yewandiisa ng’omulonzi wamu nebyetaago ebirala.
